Lòs e mucha
Ta Elis Juliana a pone base metodológiko pa estudio di kultura no-dokumentá di Kòrsou. Awendia antropologia sa ku e métodonan uzá den pasado pa studia komportamentu di antropos (hende) den su interakshon ku naturalesa tabata demasiado basá riba normanan di mundu modèrno oksidental i konsekuentemente tabata laga tiki espasio pa loke tabata biba den otro kultura. Tabata nesesario desaroyá otro metodologia di inbestigá. Elis Juliana a apliká e metodologia akí hasiendo estudio dje kultura di paden, no di pafó, es desir salí for di hende i el a laga esnan ku no tabatin bos, na palabra. E tabata sképtiko pa e importansha demasiado grandi ku tabata duna datonan stadístiko, pasobra a registrá nan por ehèmpel solamente den Punda i ta registrá únikamente e parti kuantitativo, no ta bisa nada di kalidat.

Kasi pa regla Juliana a subi tereno di historia, buskando datonan antropológiko. Anke e no tin pretenshon di ta historiadó, skritura di historia lo dun’é mérito rekonosiend’é komo historiadó-pionero di Kòrsou. Na okashonnan di importansha históriko Juliana ta laga su bos resoná, manera riba promé di yüli di aña 2003 ku a kumpli 140 aña ku kolonialismo ulandes a abolí sklabitut den su kolonianan Sürnam i Antia Ulandes. E ta duna muestra di un noshon skèrpi di bèrdat históriko.

Pasobra Juliana a inbestigá kultura na un manera sistemátiko –di Bándariba te Bándabou – el a trese variantenan kultural na kla, ku ta splika diferenshanan basá riba faktornan étniko, sosial, klimatológiko i demográfiko. Asina a bin generá un nifikashon mas amplio i integral dje konsepto kultura i a liber’é for dje malchi pèrtá i antikuá di kanto i baile so. Kultura ta tur akshon humano pa duna kontenido na bida. Niun hende na Antia no a kolekshoná i dokumentá asina tantu manera Juliana. Pa su konsiensia pa den un tempu ignorante di importansha di pueblo, hasi trabou di reskate ku propio medionan finansiero, Juliana ta un modelo i ehèmpel pa inbestigadónan lokal i su búskeda tabata un búskeda di su mes tambe. Ku e kompromiso akí el a laga hende den nan dignidat. P’esei por yama Juliana un inbestigadó wapu i krioyo ku su kultura mes a pari. Pasobra Juliana a generá un mira fundamentalmente otro riba antropologia na Kòrsou i laga marka ku no por kita riba diferente tereno mas, e ta un inovadó. El a pone base kontinuo pa un koriente nobo. Tantu su sobrá trabou sientífiko, komo esun artístiko a benefisiá ampliamente dje inmenso trabou antropológiko ku el a hasi. Pa tur esakinan ta na su lugá pa duna antropologia e promé lugá den e lista di terenonan ku Juliana tabata aktivo ariba. Pa e mésun motibunan ta un echo ku Elis Juliana (huntu ku defuntu saserdote Paul Brenneker) ta fundadó di antropologia propio na Kòrsou.

Atenshon spesial pa religion
Den su trabou di inbestigá kultura di Kòrsou, Juliana a para ketu masha hopi na religion i e papel ku esaki a i ta hunga den bida di hende na Kòrsou. El a hasi masha hopi entrevista riba e punto akí ku grandinan, kolekshoná hopi opheto i artefakto relashoná ku religion, skirbi tokante i deskribí práktika i kerensianan religioso.
Juliana: “(…) e katibu neger (…) tabata sa ku e tabata wòrdu konsiderá komo un opheto sin sintí. Ku e no tabatin pasado. Ku e no tabatin su propio kultura promé ku el a wòrdu ranká fo’i su rais étniko. Ku e no tabatin su propio ontologia, o sea su propio mira den orígen di eksistensia. Ku e no tabatin su propio religion. Ku e no por a pensa pa su mes, ni rasoná, ni husga. Ku e no por tabatin moralidat (...) e no por tabata sinti peso dje ultrahenan ni humiyashonnan. Ku e no por tabata sufri bou di sklabitut.” (Juliana 1976a: 53).
Elis Juliana ta afirmá ku hopi tempu tantu sientífikonan di afó komo di aki a kalifiká kerensianan popular komo superstishon i brua. Juliana ta logra kambia e idea akí a base di inbestigashon i insistensia. Ta e inbestigashonnan mes tabata mustr’é kaminda pa sigui, un tabata hib’é na otro. I el a bin deskubrí ku ingeniosidat di pueblo tabata kapas na krea su propio sientífikonan, su propio santunan, su propio medisina i tur loke tabatin mester.
Den e obra Elis Juliana Inbestigadó: Piedra di Mulina ta paresé diferente muestra di arianan di kua Juliana antropólogo a kolekshoná informashon i deskribí, manera e siguientenan ku ta trata kerensianan (religioso), fishinan di ántes, kunuku i entrevista ku grandinan, tantu na Kòrsou komo Boneiru. E último akí ta forma parti di 141 entrevista ku Juliana a hasi den kurso di añanan. Ta un kolekshon di material baliosísimo di dokumentashon di kultura di Kòrsou ku el a entregá entretantu na Biblioteka Públiko, spesifikamente na señor Salomon Rubens di Biblioteka Públiko pa katalogá.

Muestra parti di inventarisashon entrevista grandinan